Baadhi ya wanafunzi wa shule ya Igombavanu iliyopo Wilayani Mufindi wakiwa katika moja ya darasa ambalo halina dawati hata moja- hapa wakiandika.
Wanafunzi wa shule ya Igombavanu wakiandika.
Mwanafunzi wa shule ya Igombavanu aakiandika.
Baadhi ya wanafunzi wa shule Igombavanu.
Baadhi ya wanafunzi wa shule ya Igombavanu iliyopo
Wilayani Mufindi wakiwa katika moja ya darasa ambalo halina dawati hata
moja- hapa wakiandika.
<<<HABARI>>>
LICHA ya idara
ya elimu kuweka mikakati mbalimbali- ili kuinua sekta hiyo muhimu, bado kuna
changamoto mbalimbali zinazokwamisha jitihada za walimu na wanafunzi kuyafikia
malengo ya upatikanaji wa elimu bora na hivyo kusuasua kumtokomeza adui ujinga
miongoni mwa watanzania walio wengi.
Changamoto kubwa
katika sekta ya elimu ya msingi- ni pamoja na uchakavu wa miundombinu
mbalimbali yakiwemo majengo, kwa maana ya vyumba vya madarasa, huku baadhi ya
shule zikiwa hazina nyumba za walimu na nyingine zikiwa hazifai kwa makazi ya
wataalamu hao wa kada ya Ualimu.
Majengo mengi ya
shule za msingi muonekano wake si rafiki kwa utoaji wa elimu, ambayo ndiyo inaimbwa
kuwa ni “ufunguo wa maisha ya binadamu” na hiyo nikutokana na sekta hiyo kupewa
kisogo- licha ya kuwa ndiyo muhimili wa elimu duniani.
Shule ya msingi
Igombavanu iliyopo katika Kata ya Igombavanu- Wilaya ya Mufindi mkoani Iringa
nayo ni moja ya shule zinazokabiliwa na changamoto kama siyo matatizo rukuki,
ambayo yanachangia kwa namna moja au nyingine kuidumaza elimu nchini.
Shule hii ya
Msingi Igombavanu inakabiliwa na tatizo la uchakavu wa majengo, kwani kwa
mujibu wa viongozi husika – shule hiyo haijawahi kufanyiwa ukarabati wa aina
yoyote,tangu kuanzishwa kweke tangu miaka ya 70- hali inayosababisha majengo
yake kuwa makuu kuu yasiyo rafiki kwa elimu- kwa Walimu na wanafunzi.
Shule ya
Igombavanu vyumba vyake vya madarasa havina Sakafu- hali inayosababisha uwepo
wa vumbi darasani, na hivyo kuwasababishia magonjwa yatokanayo na vumbi
wanafunzi na hata walimu.
Changamoto
nyingine katika shule ya Msingi Igombavanu, ni kukosekana kwa milango na
madirisha kwa asilimia kubwa ya vyumba vya madarasa, hali hiyo inayodaiwa kusababisha
upepo na baridi kali inayowaathiri wanafunzi na walimu.
Uhaba wa
madawati ni changamoto nyingine ambayo ni kubwa inayosababisha baadhi ya
wanafunzi wa shule hiyo kukaa sakafuni, na mbaya zaidi darasa la awali
wanafunzi wote wakilazimika kukaa chini kwa kukosa Madawati hata moja.
Pia shule ya
Igombavanu inakabiliwa na uhaba wa Samani, kama Meza na Viti vya walimu, huku
hali mbaya zaidi ikiwa ni Meza na Viti vya walimu madarasani, jambo
linalowakwamisha walimu kukagua kazi za wanafunzi.
Uchakavu wa
Ubao (Mbao) za kuandikia darasani, asilimia
kubwa ya mbao za shule zimefutika rangi na hivyo kuwawia vigumu walimu kuumba
herufi, huku nao wanafunzi wakipata taabu ya kuona kile kilichoandikwa na
Mwalimu ubaoni.
Aghai Luhanga na Nuhu Chota ni miongoni mwa
wanafunzi wa shule ya Msingi Igombavanu- wanasema kutosakafiwa kwa vyumba vya
madarasa kunawasababishia kukohoa, kuchafuka na kuwa uchakavu wa majengo
unawatia hofu ya kuangukiwa na kuta za vyumba hivyo vya madarasa.
Angelina Ngogo na Agnes Urio wanafunzi wa darasa
la tano shuleni hapo, wasema asubuhi badala ya kuingia darasani hulazimika
kumwagilia maji vyumba vya madarasa ili kupunguza vumbi, huku akiiomba serikali
iwasaidie kutatua tatizo la uhaba wa madawati.
Yasinta Kiponda, Neema Kalinga na Gilbati Msilu-
wamesema uchakavu wa majengo hasa kutokuwepo kwa madirisha na milango
kunawasababishia baridi na upepo wawapo darasani, huku upepo ukiwasumbua pindi
wanapoandika au kusoma kwa kuwa madaftari na vitabu kupeperushwa na upepo.
Mwalimu Ronjesia Chalamila na Beatus
Kalinga ni walimu wa shule ya Msingi Igombavanu- wamesema kukosekana kwa meza
na viti vya walimu darasani kunasababisha ugumu wa kukagua kazi za wanafunzi.
Mwalimu Zailati Kavikule amesema kukosekana
kwa rangi za ubao ni changamoto inayowapa wakati mgumu walimu kuandika, kwani
herufi hazionekani kwa urahisi na hivyo kutumia muda mwingi wa kipindi katika
kazi hiyo.
Walimu wamesema hata nyumba wanazoishi hazina
Staha kwani nyumba moja yenye vyumba viwili wanaishi walimu wawili wa jinsia
tofauti jambo ambalo si busara, na limekuwa likiwakosesha amani katika majukumu
yao ya kazi.
Zelea Komba ndiye
mwalimu Mkuu wa shule ya msingi Igombavanu – anasema shule yake ilianzishwa
mwaka 1976 na mpaka sasa hakuna ukarabati uliofantika – jambo linalosababisha
majengo kuwa chakavu – huku tatizo la kukosekana kwa milango na Madirisha
wakati Sakafu haijasakafiwa kwa Simenti ni jambo linalosababisha Ugonjwa wa
Kikohozi na mafua kwa walimu na wanafunzi.
Mwalimu Komba
anasema tatizo la madawati shuleni kwake ni kubwa, kwani idadi iliyopo ni
madawati 70 pekee huku mahitaji yakiwa ni madawati 191 kwa kuwa darasa la awali
linalohitaji Madawati 30 halina hata dawati moja na hivyo kusababisha darasa
zima la awali kukaa Sakafuni (Chini).
Mwalimu Komba
anasema darasa la kwanza wanatumia vipande chakavu vya Madawati ambavyo nivya
madawati ya siku nyingi.
“Tatizo kubwa
hapa shuleni ni uchakavu wa majengo, majengo yetu kama unavyoyaona yamechakaa
sana, nahii inatokana na shule hii tangu kuanzishwa mwaka 1976 kutokufanyiwa
ukarabati, tatizo lingine kubwa ni upande wa madawati, madawati yaliyopo ni 70,
na tunahitaji madawati 161 lakini pia tunahitaji madawati 30 kwa ajili ya
wanafunzi wa awali kwani wao hawana hata dawati moja, na darasa la kwanza
wanatumia vipande vipande vilivyounganisha na vipande hivyo nivya madawati ya
muda mrefu,” Anasema Mwalimu Komba.
Mwenyekiti wa
Kamati ya shule ye Msingi Igombavanu- Faustine Nyigo- amesema shule hiyo ni
kongwe kwani ilianzishwa mnamo mwaka 1976, na tangu mwaka huo haijawahi
kukarabatiwa na awali shule hiyo paa lake liliezuliwa na hivyo kuwalazimu
kuegesha mabati, ambayo sasa wanahofia kikija kimbunga kinaweza kuleta madhara.
“Kwa upande wa
wananchi kwa kweli wanajitahidi sana, kwani pale tunapohitaji michango
wanachangia, kwa mfano choo ya wanafunzi wa kike ilititia na wananchi walikuwa
mstari wa mbele kuhakikisha wanachangia ujenzi wake, lakini hali halisi ya
majengo ya shule hii kwa sasa ni hatari,” alisema Nyigo.
Aidha Nyigo
ameiomba Halmashauri ya wilaya ya Mufindi kuiangalia kwa jicho la tatu shule
hiyo kwani kuna uwezekano wa majengo yake yakadondoka na kuleta madhara makubwa
kwa wanafunzi na walimu.
Mwenyekiti wa
serikali ya kijiji cha Igombavanu Venancy Kiponda anasema tatizo kubwa ambalo
ni kero ni madawati, lakini kwa jitihada za wananchi na mchango kutoka kwa
diwani wao walifanikiwa kujenga choo ambayo ilikuwa imebomoka.
Akizungumzia
mpango wa upatikanaji wa Vibali vya uvunaji wa miti katika shamba la Taifa la
Sao hill, Kiponda anasema hawana taarifa juu ya umiliki wa rasilimali hiyo, ila
wamekuwa wanasikia tu, na endapo wangepata fulsa hiyo wangeondokana na tatizo
la uhaba wa madawati kwa shule yao.
“Ee Katika hilo
suala la vibari limekuwa ni haditrh kwani sisi huku tunasikia tu, kwani hakuna
hata mwananchi mmoja ambaye anapata vibali, lakini sisi huku hicho kitu
hatumkitambui, sasa nilikuwa ninaomba tupewe kipaumbele kwani hali ya michango
kwa wananchi imekuwa ni kero lakini kama tukipewa kibali tunaweza kutatua
changamoto zinazokikabili kijiji chetu,” Alisema
Rashid Mkuvasa
ni diwani wa kata ya Igombavanu- anasema baada ya kupata kibali cha Kata cha
uvunaji wa miti katika Shamba la taifa la sao hill alinunua Bati 50 kwa ajili
ya shule ya msingi Lugodalutali, huku katika kijiji cha Igombavanu akitumia
shilingi laki 8 kwa ajili ya kuchimba choo cha shule.
Aidha Mkuvasa
amesema katika fedha hizo zilizotokana na Kibali cha kata - shilingi Milioni
1.4 zilisaidia ujenzi wa vyumba vya madarasa katika shule ya msingi Matelefu,
huku shule ya msingi Makongomi akiipatia Bati 24 na Mifuko 10 ya Saruji, pamoja
na kuchimba kisima cha maji katika kijiji cha Lugodalutali – mradi uliogharimu
kiasi cha shilingi laki 4 na elfu sitini.
Hata hivyo
Mkuvasa ameiomba Halmashauri ya wilaya ya Mufindi kusaidia ujenzi na ukarabati
wa shule za kata hiyo, kwa madai kuwa majengo yake ni chakavu, na wananchi
pekee kamwe hawawezi kumudu gharama hizo.
Afisa elimu
shule za msingi Wilaya ya Mufindi Mwasumilwe, amesema Wilaya ina madawati zaidi
ya 27, huku wanafunzi wakiwa zaidi ya elfu 64, huku hitaji la madawati likiwa
ni zaidi ya elfu 32 na hivyo upungufu kufikia madawati elfu 4269.
Mwasumilwe
amesema katika kukabiliana na uhaba wa vyumba vya madarasa, Halmashauri ya
Wilaya ya Mufindi kwa kipindi cha mwaka 2014/ 2015 imeadhimia kujenga vyumba 28 vya madarasa pamoja na nyumba 5 za
walimu- lengo likiwa ni kuboresha mahali pa kuishi walimu na kuboresha
mazingira ya elimu.
Mkuu wa Wilaya
ya Mufindi Evarista Kalalu akizungumzia changamoto hiyo ya Madawati na
mazingira ya shule zake wilayani humo, anasema Wilaya yake ina mpango wa
kukabiliana na uhaba wa Madawati
“Kweli tumekuwa
na shule nyingi za msingi… lakini pia ongezeko la wanafunzi nalo limekuwa ni
kubwa, serikali inaboresha mazingira ya shule kwa maana ya madarasa, Samani,
walimu pamoja na Vitabu….
Lakini kitu
ambacho kimekuwa midomoni mwa watu kwa kipindi kirefu ni madawati, lakini
kimsingi katika Wilaya ya Mufindi wanafunzi wakipangwa watatu watatu hatuna
upungufu wa dawati hata moja, tunaziada
ya madawati karibu elfu 4, tunapozungumzia upungufu wa madawati tunataka
tuhamishe wanafunzi wanaokaa watatu watatu wakae wawili wawili wasome kwa
nafasi ….na hili tumeshaanza kwani hata vibali ambavyo vimetoka hivi karibuni
viongozi husika wa vijiji tumewahimiza kuwa suala la msingi nala kuanzia ni
kwenda kwenye upungufu wa madawati,” Alisema Kalalu.
Hata hivyo
Mahamoodu Mgimwa, mbunge wa jimbo la Mufindi Kaskazini- ambaye pia ni naibu
waziri wa maliasili na Utalii- ambako shule hiyo ya msingi Igombavanu
inapatikana- amesema amejipanga vyema kumaliza kabisa tatizo la uhaba wa
madawati katika shule za jimbo lake na mpango wa kuelekeza mgao wa Vibali vya
miti vijijini, umelenga kupunguza adha ya wananchi kuchangia masuala ya
maendeleo hususani yahusuyo elimu.
MWISHO
Hakuna maoni:
Chapisha Maoni